Forum
Procesi i kthimit nuk duhet të politizohet
Qeveria e Republikës së Kosovës ka investuar shumë deri tani, dhe do të vazhdojë të investojë për kthimin e të gjithë qytetarëve të vetë në pronat dhe shtëpitë e tyre, ka thënë kryeministri i Hashim Thaçi, në takimin që ka zhvilluar me kryetarët e komunave të Kosovës. Kryeministri po ashtu ka vlerësuar se, penguesit e procesit të kthimit të qytetarëve në pronat e veta, janë të dështuar.
Kryeministri Hashim Thaçi ka zhvilluar të enjten një takim me kryetarët e komunave të Kosovës, në të cilin ka diskutuar mbështetjen aktive për realizimin e procesit të kthimit për të gjithë qytetarëve të Kosovës në shtëpitë dhe në pronat e veta, nga ana e autoritete komunale në Kosovë.
Në takim, Thaçi ka shprehur falënderimin e tij për punën dhe angazhimin e të gjitha autoriteteve komunale për të përmbushur përgjegjësit dhe obligimet e tyre, në të mirë të qytetarëve të Kosovës. “Qeveria e Republikës së Kosovës ka investuar shumë deri tani, dhe do të vazhdojë të investojë për kthimin e të gjithë qytetarëve të vetë në pronat dhe shtëpitë e tyre”, ka thënë ai.
Duke respektuar të drejtën e kthimit dhe disponimit me pronën e vet të qytetarëve, Qeveria e Republikës së Kosovës riafirmon perspektivën e qartë të vendit tonë për të qenë pjesë e integrimit në strukturat euroatlantike të NATO-së dhe të Bashkimit Evropian, ka vlerësuar Thaçi, duke shtuar se e drejta e kthimit është një e drejtë themelore e të gjithëve, pa dallim etnie, dhe ky proces nuk duhet të politizohet.
Kryeministri Thaçi ka kërkuar nga kryetarët e komunave që të angazhohen dhe të bashkëpunojnë me të gjitha strukturat vendore dhe ndërkombëtare për të mundësuar realizimin e plotë të procesit të kthimit të qytetarëve të Kosovës në shtypit dhe pronat e veta kudo në Kosovë.
Kryetari i Asociacionit të Komunave të Republikës së Kosovës, Bajram Rexhepi, ka përkrahur apelin e kryeministrit Thaçi dhe ka shprehur zotimin e kryetarëve të komunave për të realizuar këtë proces të drejtë dhe humanitarë.